Хасбазарын Бэхбат нь гадаад харилцаа, олон улсын харилцаа, дипломат албаны чиглэлээр олон улсын болон төрийн байгууллагад ажилласан арвин туршлагатай ахлах дипломатч юм. Тэрээр одоо IRIM судалгааны хүрээлэнгийн Ерөнхийлөгч, Дипломатын академийн захирлаар ажиллаж байна.
Бэхбат 1976 оноос хойш гадаад харилцааны салбарт ажиллаж эхэлсэн бөгөөд Франц улсад суугаа ЭСЯ-нд атташе, ГЯЯ-нд хэлтсийн дарга, Намын Төв Хороонд Гадаад харилцааны хэлтсийн орлогч эрхлэгч, ЮНЕСКО-гийн Монголын Үндэсний комиссын дарга зэрэг албан тушаал хашиж байсан. Түүнчлэн тэрээр Монгол Улсаас Франц, Швейцар, АНУ-д суугаа Элчин сайдаар томилогдон ажиллаж, НҮБ-ын Женев дэх төв болон олон улсын байгууллагуудын дэргэд Монгол Улсыг төлөөлөн ажилласан.
Гадаад харилцааны яамны Төрийн нарийн бичгийн даргаар ажиллах хугацаандаа олон улсын харилцааны бодлого, дипломат албаны зохион байгуулалтад бодит хувь нэмэр оруулсан. Мөн улс төрийн газрын дарга, гадаад харилцааны дэд сайдаар ажиллахдаа Монгол Улсын гадаад бодлогын хэрэгжилтэд чухал үүрэг гүйцэтгэсэн.
2015 оноос тэрээр IRIM судалгааны хүрээлэнгийн Ерөнхийлөгчөөр ажиллаж, төрийн болон хувийн хэвшлийн байгууллагын хамтын ажиллагааг гүнзгийрүүлэх, мэргэжлийн сургалт, судалгаа, зөвлөх үйлчилгээний чиглэлд идэвхтэй ажиллаж байна. Бэхбат нь Москвагийн Нийгмийн Ухааны Аспирантурт суралцаж, дэлхийн бодлогын чиглэлээр докторын зэрэг хамгаалсан.
Чүлтэмсүрэнгийн Тамир нь IRIM судалгааны хүрээлэнгийн үүсгэн байгуулагч, ТУЗ-ийн дарга, МУИС-ийн ШУС-ийн Нийгмийн ухааны салбар сургууль хариуцсан дэд захирал. Тэрээр 1996–2000 онд МУИС-д бакалавр, магистр зэргийг социологийн чиглэлээр эзэмшиж, 2014–2018 онд докторын зэрэг хамгаалсан. Тэрээр социологийн ухаанаар докторын зэрэгтэй бөгөөд 20 гаруй жил судалгаа, сургалт, зөвлөх үйлчилгээний чиглэлд ажиллаж байна.
Ч. Тамир нь 2008 онд IRIM судалгааны хүрээлэнг үүсгэн байгуулж төслийн удирдагч, зөвлөхөөр ажиллаж ирсэн. Түүнчлэн 2018 оноос тус байгууллагын ТУЗ-ийн даргаар ажилласан бөгөөд одоогоор ТУЗ-ийн даргаар ажиллаж байна.
Тэрээр нийгмийн өөрчлөлт, иргэний оролцоо, орон нутгийн хөгжил, жендэрийн тэгш байдал, боловсролын хүртээмж, төр-хувийн хэвшлийн түншлэл зэрэг сэдвээр олон судалгаа, төсөл хэрэгжүүлсэн. Тэрээр үндэсний болон олон улсын байгууллагуудын хамтарсан судалгаанд оролцож, бодлого боловсруулах, хэрэгжилтийг сайжруулахад судалгаанд суурилсан мэдлэг, арга зүйг нэвтрүүлэхэд хувь нэмрээ оруулсаар байна.
Цэвэгдоржийн Болд нь IRIM судалгааны хүрээлэнгийн үүсгэн байгуулагч, ТУЗ-ийн гишүүн, МУИС-ийн ШУС-ийн ахлах багш юм. Тэрээр 1994 онд математикч, 1996 онд социологийн мэргэжлээр МУИС-ийг төгссөн бөгөөд олон улсын болон үндэсний судалгаануудад, төслийн удирдлагч, зөвлөхөөр ажилласан туршлагатай.
Болд нь нийгмийн судалгаа, тоон шинжилгээ, боловсрол, хөдөлмөрийн зах зээлийн чиглэлээр мэргэшсэн. Тэрээр 1989–1994 онд МУИС-ийн Математик, физикийн факультетад суралцаж математикч, багш мэргэжил эзэмшсэн бөгөөд 1994–1996 онд МУИС-ийн Нийгмийн ухааны факультетад социологийн магистрын зэрэг хамгаалсан.
2001 оноос МУИС-ийн багшаар ажиллаж, судалгааны арга зүй, статистикийн хичээл зааж байна. 2008 оноос “Ай Ар Ай Эм” судалгааны хүрээлэнг үүсгэн байгуулалцаж, гүйцэтгэх захирал, төслийн удирдагч, ТУЗ-ийн дарга, ТУЗ-ийн гишүүн зэрэг албан тушаал хашиж ирсэн.
Ц. Болд нь Азийн хөгжлийн банк, НҮБ-ын төрөлжсөн агентлагууд, ЖАЙКА зэрэг олон улсын байгууллагуудын санхүүжилттэй нийгмийн бодлогын судалгаа, үнэлгээний төслүүдийг удирдан ажилласан туршлагатай. Тэрээр ядуурлын бууралт, боловсролын хүртээмж, хүүхдийн хөгжил, нийгмийн хамгаалал зэрэг олон сэдэвт судалгаанд оролцож, үр дүнд суурилсан бодлого боловсруулахад чиглэсэн судалгааг амжилттай хэрэгжүүлж байна.
Ядмаагийн Бямбасүрэн нь төрийн удирдлага, эдийн засаг, хөгжлийн бодлого судлалын чиглэлээр өндөр мэргэшсэн судлаач, багш, зөвлөх юм. Тэрээр 1999 оноос Удирдлагын академийн Мэргэжил дээшлүүлэх институтийн захирлаар ажиллаж байгаа бөгөөд үүнтэй зэрэгцэн “Ай Ар Ай Эм” болон “МИРИМ Консалтант” ХХК-ийн ТУЗ-ийн гишүүн, зөвлөхөөр ажиллаж байна.Тэрээр Монгол Улсын Их Сургуульд математикч мэргэжлээр суралцаж, дараа нь төрийн захиргаа, эдийн засаг, төрийн бодлогын чиглэлээр дотоод, гадаадын нэр хүндтэй их сургуулиудад (БНСУ-ын Күнгхэ их сургууль, Австралийн Үндэсний их сургууль) магистр, докторын зэрэг хамгаалсан.
Бямбасүрэн нь хүний хөгжил, нийгмийн хамгаалал, жендэр, засаглал, төрийн бодлогын шинжилгээний чиглэлээр онол, практикийн түвшинд мэргэшсэн зөвлөх юм.
Цэдэндамбын Батсугар нь социологи, уран зохиол болон хууль зүйн мэргэжил эзэмшсэн, судалгаа, бодлого боловсруулах, байгууллагын удирдлага болон зөвлөх үйлчилгээний чиглэлээр ажилласан туршлагатай мэргэжилтэн юм. Тэрээр 2012 оноос хойш “Ай Ар Ай Эм” ХХК-д судлаачаар ажиллаж эхэлсэн бөгөөд цаашид үйл ажиллагаа хариуцсан захирал, гүйцэтгэх захирлын албыг хашиж байв. Одоогоор ТУЗ-ийн гишүүн, төслийн хөгжлийн зөвлөхөөр ажиллаж байна.
Батсугар нь Монгол Улсын Их Сургуулийн Нийгмийн шинжлэх ухааны сургуульд Социологи, уран зохиолын чиглэлээр суралцаж, бакалаврын зэрэг хамгаалсан бөгөөд мөн Шихихутаг дээд сургуульд эрх зүйч мэргэжил эзэмшсэн. Боловсрол, хууль зүй, нийгмийн шинжлэх ухааны суурь мэдлэгийг хослуулан хөгжлийн олон талт асуудлыг харж, шийдвэр гаргагчид болон байгууллагуудад баримтад суурилсан дүн шинжилгээ, зөвлөмж өгөх чиглэлд ажилласаар ирсэн.
Түмэнжаргал овогтой Элбэрэл нь судалгаа, бодлого, хөтөлбөрийн үнэлгээний төслүүд дээр сүүлийн 12 гаруй жил ажилласан туршлагатай судлаач, үнэлгээч юм. Ажиллах хугацаандаа төр, төрийн бус байгууллага, олон улсын байгууллага болон донор байгууллагуудаас хэрэгжүүлсэн үндэсний болон орон нутгийн түвшний хөгжлийн бодлого, хөтөлбөрийн судалгаа болон хяналт шинжилгээ, үнэлгээний төслүүд дээр судлаач, зөвлөхөөр ажиллаж байсан.
2012 онд МУИС-ийн Нийгмийн Шинжлэх Ухааны Сургуулийг ‘Нийгмийн ажил’-н мэргэжлээр бакалавр зэрэгтэй төгссөн. Түүний дараагийн 6 жилд IRIM судалгааны хүрээлэнд ажиллан, 50 гаруй төслүүдийг зохицуулж, удирдаж байсан. Ялангуяа, боловсрол, эрүүл мэнд, уул уурхай, орон нутгийн хөгжил, засаглалтай холбоотой асуудлын хүрээнд судалгаа, үнэлгээний төслүүдийг хариуцан гүйцэтгэж байсан.
Мөн 2018 онд АНУ-ын Засгийн газрын санхүүжилттэй Фулбрайтын Оюутны хөтөлбөрөөр АНУ-н Georgia State University-д “Төрийн бодлого”-ын чиглэлээр магистрын зэрэгтэй төгссөн. Суралцах хугацаанд бодлогын шинжилгээ, бодлогын судалгаа, үнэлгээ чиглэлээр гүнзгийрэн сурсан.
Цаашид, бодлогын судалгаа, үнэлгээ, нотолгоонд суурилсан бодлого болон үр дүнд суурилсан соёлыг хөгжүүлэх санаачилгуудад хувь нэмрээ оруулан ажиллах эрмэлзэлтэй судлаач юм. Тэрээр 2024 оноос ТУЗ-ийн гишүүнээр ажиллаж байна.